पाँचथरमा ग्रिनेट पड्किँदा दुई बालबालिकाको मृत्यु

झापा, १४ भदौ । पाँचथरको फालेलुङ गाउँपालिकामा ग्रिनेट पड्किँदा दुई बालबालिकाको मृत्यु भएको छ भने दुई जना घाइते भएका छन् ।

फालेलुङ–५ डाँडागाउँमा बिहीबार दिउँसो स्थानीय आइतराज केरुङको घर नजिकै आँगनमा शंकास्पद बस्तु विस्फोट हुँदा चारजना बालबालिका घाइते भएको थिए । घाइतेमध्ये दिलिप साँवाका दुई वर्षीया छोरी प्रिन्सा र ११ वर्षीय छोरा दिपशनको मृत्यु भएको जिल्ला प्रहरी कार्यालय पाँचथरका प्रमुख प्रहरी नायब उपरीक्षक हेमन्त भण्डारीले जानकारी दिनुभयो । विस्फोटमा परेर गम्भीर घाइते भएका उनीहरुलाई उपचारको अस्पताल लैजाँदै गर्दा गए राति बाटोमै मृत्यु भएको हो ।

घाइते बालबालिकालाई जिल्ला अस्पताल पाँचथरमा उपचार हुन नसकेपछि थप उपचारको लागि राति बीएण्डसी अस्पताल लगिएको थियो । विस्फोटमा परेर स्थानीय ज्ञानबहादुर राईका छोरा ११ वर्षीय पवन राई र ७ वर्षीय दिपशन राई घाइते छन् ।

घाइतेमध्ये पवनको जिल्ला अस्पताल फिदिममा उपचार भइरहेको छ। दिपशनको स्थानीय स्वास्थ्य चौकीमै उपचार गरिएको छ। उनीहरु खतरा मुक्त छन् । ‘होममेड ग्रिनेट’ विस्फोट हुँदा उनीहरुको मृत्यु भएको प्रहरीको प्रारम्भिक अनुमान गरे पनि त्यसको पुष्टि गर्न बाँकी रहेको प्रहरीले जनाएको छ ।

The post पाँचथरमा ग्रिनेट पड्किँदा दुई बालबालिकाको मृत्यु appeared first on Jhapa Online.