छवि भन्छन्- रकम अपचलनमा जीबी र रवि नै मुख्य जिम्मेवार

काठमाडौं । सहकारी ठगी प्रकरणमा पक्राउ परेका छविलाल जोशीले रकम अपचलनमा रवि लामिछाने र जितेन्द्रबाबु (जीबी) राई नै मुख्य जिम्मेवार रहेको बताएका छन् ।

जिल्ला प्रहरी, कास्कीसँगको प्रारम्भिक बयानका क्रममा उनले भनेका छन्, “रकम अपचलनमा मेरो कुनै संलग्नता छैन, रवि लामिछाने र जीबी राई नै मुख्य जिम्मेवार हुन् ।”

आइतबार पक्राउ परेका जोशीलाई थप पाँच दिनसम्म हिरासतमा राखेर अनुसन्धान गर्न जिल्ला अदालत, कास्कीले अनुमति दिइसकेको छ । जसअनुसार अब उनीमाथि थप पाँच दिन अनुसन्धान हुनेछ ।

उनलाई हिजै साँझ पोखरा लगिएको थियो । गोर्खा मिडिया नेटवर्क प्रालिका पूर्वसञ्चालकसमेत रहेका जोशीमाथि तीनवटा कसूरमा अनुसन्धान गर्नुपर्ने माग प्रहरीले गरेको छ ।

पोखराको सूर्यदर्शन सहकारीको रकम गोर्खा मिडियामा ल्याएर अपचलन गरेको आरोपमा उनीविरुद्ध सहकारी ठगी, सङ्गठित अपराध र सम्पत्ति शुद्धीकरणको कसूरमा अनुसन्धान हुनेछ ।

प्रहरीले जानकारी दिएअनुसार जोशीकै बयानका आधारमा रवि लामिछानेमाथि समेत पक्राउ अनुमति लिने कास्की प्रहरीको तयारी छ । उनका साझेदार जीबीविरुद्ध भने गएको वर्ष नै पक्राउ पुर्जी जारी भएको हो तर, उनी फरार छन् ।

• सम्बन्धित समाचार

छविलाल जोशीलाई ५ दिन हिरासतमा राख्ने आदेश, पीडितको अदालत परिसरमै खबरदारी